وفاقی وزیر داخلہ محسن نقوی کا پنجاب پولیس کی جانب سے خوارج دہشت گردوں کے حملے کو ناکام بنانے پر خراج تحسین

اسلام آباد، یورپ ٹوڈے: وفاقی وزیر داخلہ محسن نقوی نے کہا ہے کہ پنجاب پولیس نے ایک بار پھر فتنہ الخوارج کے دہشت گردوں کے ناپاک عزائم کو ناکام بنا دیا ہے۔

میانوالی میں چیک پوسٹ پر دہشت گردوں کے حملے کو ناکام بنانے پر پولیس کو شاباش دیتے ہوئے وزیر داخلہ نے کہا کہ تھانہ عیسیٰ خیل کی چیک پوسٹ پر تعینات پولیس کے جوانوں نے جرات اور بہادری کے ساتھ 14 خوارج دہشت گردوں کو پسپا کر دیا۔ رات کی تاریکی میں چھپ کر حملہ کرنے والے دہشت گردوں کو پولیس نے دندان شکن جواب دیا۔

وزیر داخلہ محسن نقوی نے مزید کہا کہ “پولیس جوانوں کی پیشہ ورانہ صلاحیتوں اور دلیری کو سراہتا ہوں، اور خوارج دہشت گردوں کے حملے کو ناکام بنانے پر پنجاب پولیس کے بہادر سپوتوں کو سلام پیش کرتا ہوں۔”

انہوں نے اس عزم کا اظہار کیا کہ پولیس نے دہشت گردی کے خلاف جنگ میں ہمیشہ شجاعت اور بہادری کا مظاہرہ کیا ہے اور دہشت گردی کے خلاف جنگ میں پولیس نے سیسہ پلائی دیوار کا کردار ادا کیا ہے جو قابل تحسین ہے۔

یہ حملہ اور اس کا کامیاب جواب پنجاب پولیس کی کارکردگی کا مزید ثبوت ہے کہ وہ دہشت گردوں کے خلاف بلا تفریق کارروائی جاری رکھے ہوئے ہے۔