پہلا آذربائیجان انٹرنیشنل انویسٹمنٹ فورم 2025 کا انعقاد
باکو، یورپ ٹوڈے: پہلا آذربائیجان انٹرنیشنل انویسٹمنٹ فورم ("AIIF 2025”) باکو میں منعقد ہوگا۔ یہ پروگرام آذربائیجان کی وزارتِ معیشت اور ایگسپورٹ اینڈ انویسٹمنٹ پروموشن ایجنسی (AZPROMO) کے اشتراک سے منعقد کیا جا رہا ہے، جبکہ اسٹریٹجک شراکت داری یورپین ہاؤس – امبروزیتی (TEHA) اور "سی بریز” کے ساتھ کی گئی ہے۔ اس فورم میں حکومتی نمائندے، کاروباری رہنما اور بین الاقوامی سرمایہ کار شریک ہوں گے۔
یہ فورم ایک منفرد پلیٹ فارم فراہم کرے گا جہاں مشرق اور مغرب کے اسٹریٹجک سنگم پر واقع ممالک میں سرمایہ کاری کے مواقع کا جائزہ لیا جائے گا اور ساتھ ہی عالمی تجارت اور پائیدار سپلائی چینز کے مستقبل کی تشکیل پر بھی تبادلۂ خیال ہوگا۔
شرکاء کو عالمی مسابقت کے نئے رجحانات پر قیمتی معلومات حاصل کرنے کے ساتھ اعلیٰ سطحی روابط قائم کرنے، اسٹریٹجک معاہدوں پر دستخط کرنے اور نئی شراکت داریوں کے قیام کے مواقع بھی میسر آئیں گے۔
دو روزہ پروگرام میں عمومی، ادارہ جاتی اور پینل سیشنز، موضوعاتی مباحثے اور ایک نمائش شامل ہوگی جس میں آذربائیجان کے سرمایہ کاری کے مواقع اور امکانات کو اجاگر کیا جائے گا۔ اس کے علاوہ توانائی، ٹرانسپورٹ، صنعت، زراعت، ڈیجیٹل ترقی، صحت عامہ اور رئیل اسٹیٹ کے شعبوں میں علاقائی تعاون اور سرمایہ کاری کے امکانات پر بھی غور کیا جائے گا۔
