صدر ڈونلڈ ٹرمپ کا دعویٰ: پاکستان اور افغانستان کے درمیان کشیدگی ختم کرنا میرے لیے "بہت آسان” ہے

واشنگٹن، یورپ ٹوڈے: امریکی صدر ڈونلڈ ٹرمپ نے کہا ہے کہ پاکستان اور افغانستان کے درمیان جاری کشیدگی کو ختم کرنا ان کے لیے کوئی مشکل کام نہیں، اگر وہ چاہیں تو دونوں ممالک کے درمیان جنگ فوراً ختم کروا سکتے ہیں۔

اوول آفس میں صحافیوں سے گفتگو کرتے ہوئے صدر ٹرمپ کا کہنا تھا کہ انہیں جنگیں رکوانا پسند ہے، اور وہ پاکستان اور افغانستان کے درمیان حالیہ سرحدی صورتحال سے مکمل طور پر آگاہ ہیں۔ انہوں نے کہا کہ "اگر میں چاہوں تو یہ جنگ ابھی ختم ہوسکتی ہے۔”

بات چیت کے دوران امریکی صدر نے ایک بار پھر پاک بھارت جنگ بندی کا حوالہ دیتے ہوئے کہا کہ پاکستان کے وزیراعظم شہباز شریف نے انہیں بتایا کہ ان کی کوششوں سے پاک بھارت جنگ ختم ہوئی اور لاکھوں جانیں بچ گئیں۔

یاد رہے کہ گزشتہ دنوں افغانستان کی سرحد سے پاکستان پر حملوں میں شدت آگئی تھی، جس کے جواب میں پاکستانی افواج نے افغانستان میں دہشت گردوں کے ٹھکانوں کو نشانہ بنایا، جس کے نتیجے میں درجنوں شدت پسند ہلاک ہوئے۔

دونوں ممالک کے درمیان ابتدائی طور پر 48 گھنٹے کی جنگ بندی طے پائی تھی جس میں بعد ازاں توسیع کر دی گئی۔

سفارتی ذرائع کے مطابق افغان طالبان حکومت اور پاکستان کے درمیان عارضی جنگ بندی کو دوحہ میں جاری مذاکرات کے اختتام تک بڑھا دیا گیا ہے، جبکہ اعلیٰ سطح کے مذاکرات ہفتے کے روز شروع ہونے کا امکان ہے۔