ترک صدر ایردوان کا وزیراعظم شہباز شریف سے رابطہ، سیلاب متاثرین سے اظہارِ تعزیت اور امداد کی پیشکش

لاہور، یورپ ٹوڈے: وزیراعظم محمد شہباز شریف کو جمعرات کے روز ترکیہ کے صدر رجب طیب ایردوان کا ٹیلیفون موصول ہوا، جس میں انہوں نے پاکستان میں حالیہ سیلاب سے ہونے والی تباہ کاریوں پر اظہارِ تعزیت اور بھرپور یکجہتی کا پیغام دیا۔

صدر ایردوان نے قیمتی جانوں اور املاک کے ضیاع پر گہرے دکھ اور ہمدردی کا اظہار کرتے ہوئے اس عزم کا اعادہ کیا کہ ترکیہ ہر ممکن تعاون فراہم کرنے کے لیے تیار ہے، جس میں امدادی اور ریسکیو آپریشنز میں عملی معاونت بھی شامل ہے۔

وزیراعظم شہباز شریف نے صدر ایردوان کے نیک جذبات اور فراخدلانہ پیشکش پر شکریہ ادا کرتے ہوئے کہا کہ یہ ٹیلیفون پاکستان اور ترکیہ کے مابین گہرے، پُرخلوص اور آزمودہ برادرانہ تعلقات کا مظہر ہے۔ انہوں نے اس بات پر زور دیا کہ دونوں ممالک نے ہمیشہ ایک دوسرے کا مشکل حالات میں ساتھ دیا ہے۔

دونوں رہنماؤں نے رواں سال کے اوائل میں ہونے والی ملاقاتوں کو بھی یاد کیا اور اس امید کا اظہار کیا کہ وہ آئندہ چند روز میں چین کے شہر تیانجن میں ہونے والے شنگھائی تعاون تنظیم (SCO) سربراہ اجلاس کے موقع پر دوبارہ ملاقات کریں گے۔