متحدہ عرب امارات کا پاکستانی شہریوں کے لیے پانچ سالہ ویزہ اسکیم کا اعلان: 1 لاکھ افراد مستفید ہوں گے
کراچی، یورپ ٹوڈے: متحدہ عرب امارات (یو اے ای) کے سفیر حمد عبید الزعابی نے بدھ کے روز گورنر سندھ کامران ٹیسوری سے ملاقات کے دوران اعلان کیا کہ یو اے ای 1 لاکھ پاکستانی شہریوں کو پانچ سالہ ویزے جاری کرے گا۔ اس فیصلے کا مقصد پاکستان اور یو اے ای کے درمیان تعلقات کو مزید مستحکم بنانا ہے۔
سفیر الزعابی نے یقین دہانی کروائی کہ ویزہ درخواست دہندگان کو “ریڈ کارپٹ” استقبال اور مکمل عزت و احترام کے ساتھ ویزہ مراکز پر سہولیات فراہم کی جائیں گی۔
انہوں نے کہا: “ہم ویزہ مراکز میں آنے والے پاکستانی شہریوں کو عزت و احترام دیں گے اور ہر ممکن تعاون فراہم کریں گے۔ یہ اقدام دونوں ممالک کے تعلقات کو مضبوط بنانے کی ایک اہم کڑی ہے۔”
اس سے قبل گورنر سندھ کامران ٹیسوری یو اے ای قونصل خانے کراچی کے دورے پر پہنچے جہاں انہیں گرمجوشی سے خوش آمدید کہا گیا۔ انہوں نے ویزہ مرکز کا دورہ کیا اور سفیر الزعابی نے انہیں ویزہ سہولیات اور مرکز کی کارکردگی سے متعلق بریفنگ دی۔
میڈیا سے گفتگو کرتے ہوئے گورنر سندھ نے یو اے ای حکام کی مہمان نوازی پر اظہار تشکر کرتے ہوئے کہا: “مجھے ریڈ کارپٹ پر خوش آمدید کہا گیا، جو ان کی محبت اور خلوص کا مظہر ہے۔”
انہوں نے قونصل خانے کے ویزہ مرکز میں فراہم کی جانے والی خدمات پر یو اے ای حکومت کا شکریہ ادا کیا اور خصوصی سرمایہ کاری سہولت کونسل (SIFC) میں یو اے ای کی دلچسپی کو سراہا۔
یاد رہے کہ ایک روز قبل بھی سفیر الزعابی نے گورنر سندھ سے ملاقات میں واضح کیا تھا کہ اب پاکستانی شہری یو اے ای کے پانچ سالہ ویزے کے لیے درخواست دے سکتے ہیں۔ یہ اعلان یو اے ای حکام کی اس تصدیق کے بعد سامنے آیا کہ پاکستانی شہریوں پر کوئی ویزہ پابندی نہیں ہے۔
وزارت خارجہ کے مطابق، یو اے ای کے نئے پانچ سالہ ویزہ پالیسی کے تحت درخواست گزاروں کو واپسی کا ٹکٹ، ہوٹل کی بکنگ، جائیداد کی ملکیت کا ثبوت (اگر موجود ہو)، اور 3,000 درہم بطور ڈپازٹ جمع کروانا ہوگا۔
