جرمنی، فرانس اور برطانیہ کی غزہ میں فوری جنگ بندی کی اپیل
لندن، یورپ ٹوڈے: برطانیہ، جرمنی اور فرانس کی حکومتوں نے جمعہ کے روز ایک مشترکہ بیان جاری کیا، جس میں غزہ میں فوری جنگ بندی کی ضرورت پر زور دیا گیا اور اسرائیل سے مطالبہ کیا گیا کہ وہ انسانی امداد کی بحالی کو یقینی بنائے۔
بین الاقوامی میڈیا کے مطابق، تینوں ممالک کے وزرائے خارجہ، جو ای 3 گروپ کے نام سے جانے جاتے ہیں، نے اپنے بیان میں کہا: “ہم اسرائیل سے مطالبہ کرتے ہیں کہ وہ انسانی امداد کی بحالی، بشمول پانی اور بجلی کی فراہمی، کو یقینی بنائے اور بین الاقوامی انسانی قوانین کے مطابق طبی امداد اور عارضی طبی انخلا کی سہولت فراہم کرے۔”
وزرائے خارجہ نے عام شہریوں کی ہلاکتوں پر شدید افسوس کا اظہار کرتے ہوئے فلسطینی مزاحمتی گروپ حماس سے اسرائیلی یرغمالیوں کی فوری رہائی کا مطالبہ کیا۔
انہوں نے مزید کہا کہ اسرائیل اور فلسطین کے درمیان تنازع کو فوجی ذرائع سے حل نہیں کیا جا سکتا اور پائیدار جنگ بندی ہی امن کے قیام کا واحد قابلِ عمل راستہ ہے۔
ای 3 وزرائے خارجہ نے غزہ میں اقوامِ متحدہ کے دفتر برائے پروجیکٹ سروسز (UNOPS) کی عمارت پر ہونے والے حملے پر گہرے صدمے کا اظہار کرتے ہوئے اس واقعے کی فوری اور مکمل تحقیقات کا مطالبہ کیا۔
