چینی صدر کا وزیرِ اعظم شہباز شریف کی سالگرہ پر مبارکباد کا خط
اسلام آباد، یورپ ٹوڈے: چینی صدر عزت مآب شی جن پنگ نے وزیرِ اعظم شہباز شریف کی سالگرہ کے موقع پر ایک خط لکھ کر انہیں مبارکباد دی ہے، جو پاک چین سفارتی تعلقات کی مضبوطی کے حوالے سے ایک اہم سنگ میل ثابت ہو رہا ہے۔
صدر شی جن پنگ نے اپنے خط میں کہا کہ “آپ کی سالگرہ پر مبارکباد اور نیک تمناؤں کا اظہار کرتا ہوں۔ پاکستان اور چین ہمیشہ کٹھن اور خوشگوار وقتوں میں ایک دوسرے کے اسٹریٹیجک تعاون کے شراکت دار رہے ہیں۔”
خط میں چینی صدر نے مزید کہا کہ دونوں ممالک کے مابین ایسا مضبوط رشتہ قائم ہوا ہے کہ بین الاقوامی منظر نامے کی تبدیلی اس پر اثرانداز نہیں ہو سکتی۔ انہوں نے وزیرِ اعظم کے رواں برس جون میں چین کے کامیاب دورے کی بھی تعریف کی، جس میں خوشگوار تبادلہ خیال ہوا اور کئی امور پر اتفاق رائے قائم ہوا۔
شی جن پنگ نے کہا کہ “چین پاکستان تعلقات کی مضبوطی میرے لیے انتہائی اہمیت کی حامل ہے۔ میں آپ کے ساتھ مل کر اسٹریٹجک تعاون کے فروغ اور سی پیک کی تعمیر کے لیے کام کرنے کا خواہاں ہوں۔”
انہوں نے اپنے خط کے اختتام پر وزیرِ اعظم کے لیے اچھی صحت اور کامیابی کی دعا بھی کی۔ یہ خط دونوں ممالک کے درمیان دوستی اور تعاون کی ایک نئی مثال قائم کرتا ہے۔
