سیاحتی کشتیوں کے الٹنے پر صدر شی جن پنگ کی امدادی کارروائیوں میں بھرپور کوششوں کی ہدایت

بیجنگ، یورپ ٹوڈے: چینی صدر شی جن پنگ نے جنوب مغربی چین کے صوبہ گوئژو میں دو سیاحتی کشتیوں کے دریا میں الٹنے کے واقعے کے بعد زخمیوں کے علاج اور پانی میں گرنے والے افراد کی تلاش کے لیے ہر ممکن کوشش کرنے کی ہدایت کی ہے۔

یہ افسوسناک واقعہ اتوار کی سہ پہر 4 بج کر 40 منٹ پر چینی صوبے گوئژو کے شہر چیانشی میں واقع ایک مشہور سیاحتی مقام پر پیش آیا، جس کے نتیجے میں تین افراد جاں بحق جبکہ 14 لاپتہ ہو گئے۔ حادثے میں زخمی ہونے والے 60 افراد کو فوری طور پر اسپتال منتقل کیا گیا، جہاں ان کا علاج جاری ہے۔

صدر شی جن پنگ، جو چینی کمیونسٹ پارٹی (سی پی سی) کی مرکزی کمیٹی کے جنرل سیکریٹری اور سنٹرل ملٹری کمیشن کے چیئرمین بھی ہیں، نے واقعے پر فوری ردعمل دیتے ہوئے اہم ہدایات جاری کیں۔ انہوں نے امدادی کارروائیوں کو ترجیحی بنیادوں پر جاری رکھنے، متاثرین کے معاملات کو مناسب طریقے سے نمٹانے اور ان کے اہل خانہ کو تسلی دینے پر زور دیا۔

صدر شی نے اس بات پر تشویش کا اظہار کیا کہ حالیہ دنوں میں مختلف علاقوں میں کئی افسوسناک واقعات پیش آئے ہیں جن میں انسانی جانوں کا ضیاع ہوا ہے۔ انہوں نے متعلقہ حکام کو ہدایت دی کہ ان واقعات سے سبق حاصل کرتے ہوئے لاپرواہی کا خاتمہ کریں اور تمام متعلقہ فریقین کی ذمہ داریوں کو مزید مضبوط بنائیں۔

صدر شی نے زور دیا کہ سیاحتی مقامات، عوامی اجتماعات کی بڑی جگہوں، رہائشی علاقوں اور تعطیلات سے واپسی کے دوران استعمال ہونے والی سفری سہولیات میں حفاظتی اقدامات کو مزید مؤثر بنایا جائے تاکہ سنگین حادثات کی روک تھام ممکن ہو سکے۔

چینی وزیراعظم لی چیانگ، جو سی پی سی پولیٹیکل بیورو کی اسٹینڈنگ کمیٹی کے رکن بھی ہیں، نے بھی وسیع پیمانے پر امدادی اور علاج معالجے کی کوششوں پر زور دیا۔ انہوں نے کہا کہ مقامی حکام کو یوم مئی کی تعطیلات کے اختتام پر تمام اہم مقامات اور شعبوں میں جامع معائنہ کرنا چاہیے تاکہ ممکنہ خطرات کی نشاندہی ہو سکے اور بڑے حادثات سے بچا جا سکے۔

نائب وزیراعظم ژانگ گووچنگ، جو سی پی سی پولیٹیکل بیورو کے رکن ہیں، نے بھی امدادی کارروائیوں کی نگرانی کے لیے جائے وقوعہ کا دورہ کیا اور ریسکیو اور بحالی کے عمل کی رہنمائی کی۔