ماہِ رمضان کی آمد پر صدر آصف علی زرداری کا قوم اور امتِ مسلمہ کو پیغام، رحمت و مغفرت کے مہینے سے بھرپور استفادے کی تلقین

اسلام آباد: صدرِ مملکت آصف علی زرداری نے ماہِ مقدس رمضان المبارک کی آمد پر قوم اور امتِ مسلمہ کو مبارکباد پیش کرتے ہوئے اسے رحمت، مغفرت اور نجات کا مہینہ قرار دیا ہے۔

اپنے پیغام میں صدرِ مملکت نے کہا کہ رمضان المبارک خود احتسابی، ایمان کی مضبوطی، صبر و قربانی اور اللہ تعالیٰ سے قربت حاصل کرنے کا بہترین موقع فراہم کرتا ہے۔ انہوں نے کہا کہ روزہ محض کھانے پینے سے اجتناب کا نام نہیں بلکہ یہ روحانی تربیت، اخلاقی تطہیر اور احساسِ ذمہ داری کا عملی اظہار ہے۔

سورۃ البقرہ کی آیت کا حوالہ دیتے ہوئے صدر نے کہا کہ روزہ اہلِ ایمان پر اس لیے فرض کیا گیا تاکہ وہ تقویٰ اختیار کریں۔ انہوں نے کہا کہ رمضان المبارک انسان کو صبر، شکرگزاری، درگزر اور معاشرے کے غریب و نادار طبقات کے ساتھ ہمدردی جیسے اوصاف یاد دلاتا ہے۔

صدر مملکت نے کہا کہ رمضان مسلمانوں کو قرآنِ مجید سے اپنا تعلق مضبوط کرنے، نمازوں کی پابندی، دعا و ذکرِ الٰہی میں مشغول رہنے اور معاشرے میں اخوت، رواداری اور اتحاد کو فروغ دینے کی ترغیب دیتا ہے۔ انہوں نے کہا کہ یہ بابرکت مہینہ سماجی ناانصافیوں کے خاتمے کے لیے اجتماعی شعور بھی بیدار کرتا ہے۔

انہوں نے قوم پر زور دیا کہ وہ رمضان کی برکتوں سے بھرپور فائدہ اٹھاتے ہوئے اپنی روزمرہ زندگی میں سچائی، دیانت داری، انصاف اور خدمتِ خلق کو فروغ دیں اور ملک کی ترقی، استحکام اور خوشحالی کے لیے اتحاد اور ذمہ داری کا مظاہرہ کریں۔

صدر آصف علی زرداری نے کہا کہ ایسے وقت میں جب پاکستان مختلف سماجی و معاشی چیلنجز کا سامنا کر رہا ہے، رمضان المبارک امید، صبر اور اجتماعی یکجہتی کا پیغام لے کر آتا ہے۔ انہوں نے اس عزم کا اظہار کیا کہ قوم ذاتی مفادات سے بالاتر ہو کر قومی و اجتماعی فلاح کو ترجیح دے۔

انہوں نے دعا کی کہ اللہ تعالیٰ قوم کو رمضان المبارک کی حقیقی روح کو سمجھنے اور اس پر عمل کرنے کی توفیق عطا فرمائے، پاکستان کو امن، استحکام اور ترقی سے ہمکنار کرے اور عوام کی عبادات و دعاؤں کو قبول فرمائے۔ صدر نے اپنے پیغام کا اختتام “پاکستان زندہ باد” کے نعرے کے ساتھ کیا۔