نشانِ حیدر یافتہ راشد منہاس شہید کو پاک فضائیہ کا خراجِ عقیدت

Read Time:1 Minute, 38 Second

کراچی، یورپ ٹوڈے: پاک فضائیہ کے عظیم قومی ہیرو پائلٹ آفیسر راشد منہاس شہید، نشانِ حیدر کی لازوال قربانی کو خراجِ عقیدت پیش کرنے کے لیے کراچی میں ان کی آخری آرام گاہ پر پھولوں کی چادر چڑھانے کی پُروقار تقریب منعقد ہوئی۔

پاک فضائیہ کے چاق و چوبند دستے کی قیادت ایئر وائس مارشل اختر عمران سدوزئی، ایئر آفیسر کمانڈنگ سدرن ایئر کمانڈ، نے کی۔ ایئر وائس مارشل اختر عمران سدوزئی نے مزارِ شہید پر حاضری دی، فاتحہ خوانی کی اور سربراہِ پاک فضائیہ، ایئر چیف مارشل ظہیر احمد بابر سدھو کی جانب سے قومی ہیرو کی قبر پر پھولوں کی چادر چڑھائی۔

اس موقع پر پاک فضائیہ کے دستے نے شہید راشد منہاس کو ان کی بے مثال جرأت، فرض سے غیر متزلزل وابستگی اور وطن کے دفاع کی خاطر دی جانے والی عظیم قربانی پر سلام پیش کیا۔

راشد منہاس شہید کا تابندہ کردار آج بھی پاک فضائیہ کی قابلِ فخر روایات کا روشن استعارہ ہے، جہاں فرض، عزت اور قربانی کو ہمیشہ بلند ترین مقام حاصل رہا ہے۔ ان کی عظیم قربانی نے قومی تاریخ میں حب الوطنی، شجاعت اور فرض شناسی کی ایک لازوال مثال قائم کی۔

تقریب کے دوران پاک فضائیہ کے اس غیر متزلزل عزم کا اعادہ کیا گیا کہ وطنِ عزیز کی خودمختاری اور علاقائی سالمیت کے تحفظ کے لیے ہر ممکن اقدام اٹھایا جائے گا۔ اس عزم کا بھی اظہار کیا گیا کہ پاک فضائیہ ہر قسم کے چیلنج سے نمٹنے کے لیے جرأت، پیشہ ورانہ مہارت، اعلیٰ سطح کی جنگی تیاری اور پختہ عزم کے ساتھ ہمہ وقت تیار ہے۔

یہ پُروقار تقریب پاک فضائیہ کے ان تمام عظیم شہداء کو بھی خراجِ عقیدت پیش کرنے کا موقع تھی جنہوں نے وطن کے دفاع اور سلامتی کے لیے اپنی جانوں کا نذرانہ پیش کیا۔ ان شہداء کی لازوال قربانیاں آنے والی نسلوں کے لیے جرأت، عزم، فرض شناسی اور حب الوطنی کا مینارِ نور ہیں اور قومی تاریخ کے صفحات پر ہمیشہ تابندہ رہیں گی۔