پاکستان سمندری سلامتی، ماحولیاتی پائیداری اور پیشہ ورانہ استعداد بہتر بنانے کے لیے پرعزم ہے: وزیراعظم شہباز شریف

Read Time:1 Minute, 52 Second

اسلام آباد، یورپ ٹوڈے: وزیراعظم محمد شہباز شریف نے کہا ہے کہ پاکستان ایک ذمہ دار بحری ملک کی حیثیت سے سمندری تحفظ و سلامتی، ماحولیاتی پائیداری اور پیشہ ورانہ استعداد میں بہتری لانے کے لیے پرعزم ہے تاکہ بین الاقوامی معیارات کے مطابق ایک مضبوط، جدید اور عالمی سطح پر مسابقتی بحری شعبہ تشکیل دیا جا سکے۔ 

عالمی یومِ بحریہ کے موقع پر اپنے پیغام میں وزیراعظم نے کہا کہ حکومت پاکستان کی بحری صلاحیتوں سے بھرپور استفادہ کرتے ہوئے انہیں پائیدار معاشی و قومی ترقی، پیشرفت اور خوشحالی کے لیے مؤثر ذریعہ بنانے کے عزم پر قائم ہے۔

انہوں نے کہا کہ پاکستان محفوظ، مؤثر، پُرامن اور ماحولیاتی طور پر پائیدار بحری نقل و حمل کے فروغ کے لیے پرعزم ہے۔ بحری شعبہ ملکی تجارت، تجارتی روابط، علاقائی و عالمی دفاعی روابط اور بلیو اکانومی سے متعلق معاشی سرگرمیوں کا اہم ستون ہے۔

وزیراعظم نے کہا کہ رواں سال عالمی یومِ بحریہ کا موضوع ’’پالیسی سے عمل تک: بحری برتری کے لیے پیش رفت‘‘ ہے، جو بین الاقوامی بحری معیارات سے ہم آہنگی اور عالمی بحری تنظیم (IMO) کے متعلقہ کنونشنز پر مؤثر عملدرآمد کی اہمیت کو اجاگر کرتا ہے۔

انہوں نے کہا کہ پاکستان کی بحری صلاحیتوں کی ترقی اور انہیں مزید مضبوط بنانا پاکستان وژن 2047 کے اہداف کے حصول کے لیے بھی ناگزیر ہے۔

وزیراعظم نے بحری سلامتی، تحفظ اور متعلقہ خدمات سے وابستہ افراد کی پیشہ ورانہ صلاحیتوں میں اضافے، معیاری بحری تعلیم و تربیت کے فروغ اور بین الاقوامی سطح پر تسلیم شدہ سرٹیفکیشن کو یقینی بنانے کے عزم کا اظہار کیا۔

انہوں نے کہا کہ پاکستان ماحول دوست بحری نقل و حمل کے فروغ، کاربن کے اخراج میں کمی اور سمندری ماحول کے تحفظ کے لیے بھی اقدامات جاری رکھے ہوئے ہے۔

وزیراعظم نے کہا کہ مشترکہ اور خوشحال مستقبل کے لیے عالمی برادری کو متبادل بحری ایندھن، جدید ٹیکنالوجی کے استعمال، ذمہ دارانہ توانائی کے استعمال اور سمندری آلودگی کی روک تھام پر مزید توجہ دینا ہوگی۔

انہوں نے مزید کہا کہ قومی سطح پر بحری شعبے کی ڈیجیٹل تبدیلی کے عمل کو تیز کرنے کے لیے اسمارٹ شپنگ، مربوط بندرگاہی نظام، مصنوعی ذہانت، پیش گوئی کرنے والی ٹیکنالوجیز اور سائبر سکیورٹی کے نظام کو مضبوط بنانے سمیت مختلف اقدامات کیے جا رہے ہیں۔