پنجاب میں مہلک بیماریوں کی روک تھام کے لیے جامع پروگرام کی منظوری، صوبہ بھر میں آگاہی مہم کا آغاز

Read Time:2 Minute, 2 Second

لاہور، یورپ ٹوڈے: وزیراعلیٰ پنجاب مریم نواز شریف نے صوبے بھر میں مہلک بیماریوں کے پھیلاؤ کو روکنے کے لیے ایک جامع پروگرام کے اجراء کی اصولی منظوری دے دی ہے۔

تفصیلات کے مطابق "چیف منسٹر پنجاب ڈیزیز پریوینشن پروگرام” کے تحت ذیابیطس، تپ دق (ٹی بی)، ایڈز اور ہیپاٹائٹس جیسے امراض کی روک تھام پر خصوصی توجہ دی جائے گی، جبکہ جان لیوا بیماریوں سے متعلق صوبہ بھر میں آگاہی مہم بھی شروع کی جائے گی۔

یہ فیصلہ وزیراعلیٰ کی زیر صدارت ہونے والے ایک اجلاس میں کیا گیا، جس میں سیکریٹری صحت و آبادی نادیہ ثاقب نے تفصیلی بریفنگ دی۔ اجلاس میں طے پایا کہ مہلک بیماریوں کی روک تھام اور علاج سے متعلق آگاہی مہم کی قیادت خود وزیراعلیٰ کریں گی۔

وزیراعلیٰ نے متعلقہ حکام کو ہدایت دی کہ بیماریوں کے تدارک کے لیے مؤثر اقدامات کیے جائیں اور سرکاری اسپتالوں میں معیاری عملی طریقہ کار (ایس او پیز) پر سختی سے عملدرآمد یقینی بنایا جائے، خصوصاً وبائی اور تیزی سے پھیلنے والی بیماریوں کی روک تھام کے لیے۔

انہوں نے ہیلتھ کیئر کمیشن کو نجی اسپتالوں اور کلینکس میں بھی ایس او پیز پر عملدرآمد کی نگرانی کی ہدایت کی، جبکہ صوبے بھر میں عطائیوں کے خلاف سخت قانونی کارروائی کا حکم بھی دیا۔

مریم نواز شریف نے اس امر پر زور دیا کہ مہلک اور متعدی بیماریوں سے بچاؤ کے حوالے سے عوام میں شعور اجاگر کرنا انتہائی ضروری ہے، جبکہ بیماریوں کی بروقت تشخیص بھی نہایت اہمیت کی حامل ہے۔

دریں اثنا، ورلڈ کریئیٹوٹی اینڈ انوویشن ڈے کے موقع پر اپنے پیغام میں وزیراعلیٰ نے کہا کہ صحت کے شعبے سمیت مختلف سرکاری اداروں میں اسمارٹ آئی ٹی سلوشنز متعارف کروائے جا رہے ہیں۔ انہوں نے بتایا کہ صوبے میں انفارمیشن ٹیکنالوجی، مصنوعی ذہانت اور جدید ٹیکنالوجیز کے فروغ پر خصوصی توجہ دی جا رہی ہے۔

انہوں نے مزید کہا کہ لاہور میں صوبے کا پہلا "نواز شریف آئی ٹی سٹی” قائم کیا جائے گا، جبکہ گوگل کے تعاون سے ایک لاکھ سے زائد طلبہ کے لیے مفت سرٹیفکیشن کورسز شروع کیے گئے ہیں اور آئی ٹی ٹریننگ کے فروغ کے لیے عملی اقدامات کیے جا رہے ہیں۔

وزیراعلیٰ نے کہا کہ الیکٹرک بسوں کے اجراء سے پنجاب کا ٹرانسپورٹ نظام جدت کی راہ پر گامزن ہو چکا ہے، جبکہ لاہور اور راولپنڈی کے درمیان تیز رفتار ٹرین سروس اور مقامی روٹس پر نئی ٹرینوں کے اجراء سے سفری نظام کو جدید خطوط پر استوار کیا جا رہا ہے۔