یورپی یونین کی اعلیٰ نمائندہ کاجا کالاس کی وزیراعظم شہباز شریف سے ملاقات، دوطرفہ تعلقات اور علاقائی صورتحال پر تبادلہ خیال

Read Time:1 Minute, 45 Second

اسلام آباد، یورپ ٹوڈے: یورپی یونین کی خارجہ امور و سلامتی پالیسی کی اعلیٰ نمائندہ اور یورپی کمیشن کی نائب صدر کاجا کالاس نے پیر کے روز وزیراعظم ہاؤس اسلام آباد میں وزیراعظم اسلامی جمہوریہ پاکستان شہباز شریف سے ملاقات کی، جس میں علاقائی اور بین الاقوامی صورتحال پر تفصیلی تبادلہ خیال کیا گیا۔

ملاقات میں نائب وزیراعظم و وزیر خارجہ سینیٹر اسحاق ڈار، وفاقی وزیر قانون و انصاف سینیٹر اعظم نذیر تارڑ, اٹارنی جنرل پاکستان منصور عثمان اعوان، معاون خصوصی برائے خارجہ امور طارق فاطمی سمیت دیگر اعلیٰ حکام بھی موجود تھے۔

وزیراعظم شہباز شریف نے یورپی یونین کی اعلیٰ نمائندہ کا خیرمقدم کرتے ہوئے کہا کہ پاکستان یورپی یونین کے ساتھ اپنے کثیر الجہتی شراکت داری کے تعلقات کو مزید مضبوط بنانے کا خواہاں ہے۔

انہوں نے حال ہی میں منعقد ہونے والے پاکستان-یورپی یونین اسٹریٹجک ڈائیلاگ کے آٹھویں دور پر اطمینان کا اظہار کرتے ہوئے تجارت، سرمایہ کاری، موسمیاتی تبدیلی، سلامتی، نقل مکانی، پائیدار ترقی اور رابطہ کاری کے شعبوں میں تعاون بڑھانے کے عزم کا اعادہ کیا۔ وزیراعظم نے کہا کہ جی ایس پی پلس اسٹیٹس پاکستان اور یورپی یونین کے درمیان تجارتی روابط کے فروغ میں کلیدی کردار ادا کر رہا ہے۔

وزیراعظم نے خلیجی خطے میں امن کے لیے پاکستان کی کوششوں کی یورپی یونین کی حمایت پر شکریہ ادا کیا اور کہا کہ ان کوششوں میں نائب وزیراعظم اسحاق ڈار اور فیلڈ مارشل سید عاصم منیر اہم کردار ادا کر رہے ہیں۔ انہوں نے عالمی برادری خصوصاً یورپی یونین پر زور دیا کہ وہ خطے میں دیرپا امن کے لیے مشترکہ کوششیں جاری رکھے۔

وزیراعظم نے جنوبی ایشیا کی علاقائی صورتحال اور افغانستان سے متعلق پاکستان کے مؤقف سے بھی یورپی نمائندہ کو آگاہ کیا۔

انہوں نے یورپی کونسل کے صدر انتونیو کوسٹا اور یورپی کمیشن کی صدر ارسلا فون ڈیر لائن کے لیے نیک خواہشات کا اظہار کرتے ہوئے انہیں جلد پاکستان کے دورے کی دعوت بھی دہرائی۔

یورپی یونین کی اعلیٰ نمائندہ کاجا کالاس نے علاقائی امن کے لیے پاکستان کے کردار کو سراہا اور پاکستان کے ساتھ اسٹریٹجک روابط مزید گہرا کرنے میں یورپی یونین کی دلچسپی کا اظہار کیا۔