وینزویلا کے تباہ کن زلزلے پر انڈونیشیا کا اظہارِ تعزیت، امدادی تعاون کی پیشکش

Read Time:2 Minute, 12 Second

جکارتہ، یورپ ٹوڈے: انڈونیشیا نے وینزویلا میں 24 جون کو آنے والے تباہ کن زلزلے پر گہرے دکھ اور افسوس کا اظہار کرتے ہوئے بولیویرین جمہوریہ وینزویلا کی حکومت، عوام اور متاثرہ خاندانوں سے دلی تعزیت اور ہمدردی کا اظہار کیا ہے۔

انڈونیشیا کی وزارت خارجہ نے ہفتہ کے روز اپنے سرکاری سوشل میڈیا پلیٹ فارمز پر جاری بیان میں زلزلے سے متاثرہ افراد کے ساتھ اظہارِ یکجہتی کرتے ہوئے کہا کہ انڈونیشیا اس مشکل وقت میں وینزویلا کی حکومت اور عوام کے ساتھ کھڑا ہے۔

بیان میں کہا گیا، "ہماری دعائیں اور ہمدردیاں ان تمام خاندانوں کے ساتھ ہیں جنہوں نے اپنے پیاروں کو کھو دیا، اور ان تمام افراد کے ساتھ ہیں جو اس المناک سانحے سے متاثر ہوئے ہیں۔”

وزارت خارجہ نے کہا کہ طاقتور زلزلے کے نتیجے میں بڑے پیمانے پر جانی نقصان اور بنیادی ڈھانچے کو شدید نقصان پہنچا، تاہم انڈونیشیا کو یقین ہے کہ وینزویلا کے عوام اپنی ثابت قدمی اور عزم کے ذریعے اس آفت سے نکل کر دوبارہ تعمیر و بحالی کا عمل کامیابی سے مکمل کریں گے۔

بیان میں مزید کہا گیا، "ہم وینزویلا کی حکومت اور عوام کے ساتھ مکمل یکجہتی کا اظہار کرتے ہیں اور یقین رکھتے ہیں کہ وہ آنے والے مشکل دنوں میں ہمت، حوصلے اور اتحاد کے ساتھ اس بحران پر قابو پالیں گے۔”

سرکاری اطلاعات کے مطابق وینزویلا کے شمالی ساحلی علاقے میں 7.2 اور 7.5 شدت کے دو طاقتور زلزلے آئے، جنہیں گزشتہ 125 برسوں کے دوران ملک میں ریکارڈ کیا جانے والا شدید ترین زلزلہ قرار دیا جا رہا ہے۔

قومی اسمبلی کے اسپیکر خورخے روڈریگیز کے مطابق ہفتے تک ہلاکتوں کی تعداد بڑھ کر ایک ہزار 430 ہو چکی تھی، جبکہ تین ہزار 238 افراد زخمی ہوئے۔

زلزلے کے بعد نائب صدر ڈیلسی روڈریگیز نے ملک کے متعدد علاقوں، خصوصاً لا گوائرا اور دارالحکومت کراکس میں شدید تباہی کے پیش نظر قومی ہنگامی حالت نافذ کرنے کا اعلان کیا۔

دریں اثنا، عالمی برادری نے وینزویلا کے لیے انسانی امداد کی فراہمی کا سلسلہ شروع کر دیا ہے، جبکہ امریکہ اور روس سمیت کئی ممالک نے امدادی اور بحالی کی کارروائیوں میں تعاون کی پیشکش کی ہے۔

ادھر انڈونیشیا کی قومی سرچ اینڈ ریسکیو ایجنسی (باسارناس) نے بھی ضرورت پڑنے پر امدادی کارروائیوں میں حصہ لینے کے لیے اپنی آمادگی ظاہر کی ہے۔

باسارناس کے آپریشنز ڈائریکٹر ایڈی پراکوسو نے کہا کہ اگر انڈونیشیا کی مرکزی حکومت ہدایت دے تو ادارہ وینزویلا میں امدادی ٹیمیں بھیجنے کے لیے تیار ہے۔ انہوں نے کہا کہ باسارناس کو ترکیہ اور میانمار میں زلزلوں کے بعد امدادی کارروائیوں کا وسیع تجربہ حاصل ہے، جسے وینزویلا میں بھی بروئے کار لایا جا سکتا ہے۔