ڈنمارک اور ایئر گرین لینڈ کے درمیان نگرانی کے لیے طیارے لیز پر لینے سے متعلق مذاکرات جاری

کوپن ہیگن، یورپ ٹوڈے: ڈنمارک کی وزارتِ دفاع اور ایئر گرین لینڈ کے درمیان خطے میں نگرانی کے فرائض کو مؤثر انداز میں انجام دینے کے لیے طیارے لیز پر لینے سے متعلق مذاکرات جاری ہیں۔ یہ بات ہفتے کے روز وزارتِ دفاع کی جانب سے جاری بیان میں بتائی گئی، جسے مقامی میڈیا نے رپورٹ کیا۔

ڈنمارک کے وزیرِ دفاع ٹرولز لُنڈ پولسن نے ہفتہ کی سہ پہر نوک (نوؤک) میں گرین لینڈ کی وزیرِ خارجہ ویویان موٹسفیلڈٹ کے ہمراہ مشترکہ پریس کانفرنس سے خطاب کرتے ہوئے کہا کہ یہ اقدام ریاستی امور کی انجام دہی میں گرین لینڈ کی کمپنیوں کو شامل کرنے کی وسیع تر حکومتی پالیسی کا حصہ ہے۔

مجوزہ معاہدے کے تحت ایئر گرین لینڈ گرین لینڈ کی فضائی حدود میں نگرانی کے مشنز میں حصہ لے گی۔ یہ پیش رفت آرکٹک اور نارتھ اٹلانٹک سے متعلق پہلے مرحلے کے معاہدے کی شقوں سے ہم آہنگ ہے، جس پر متعلقہ فریقین اور گرین لینڈ کی حکومت نے دستخط کیے تھے۔ مذکورہ معاہدے کے تحت چیلیجر طیاروں کو مرحلہ وار ختم کرنے اور آرکٹک میں نگرانی اور ریسکیو کے فرائض سول شراکت داروں کے حوالے کرنے کی تجویز دی گئی ہے۔

بیان میں کہا گیا کہ گرین لینڈ جیسے خصوصی موسمی اور جغرافیائی حالات میں پرواز کا تجربہ رکھنے والے ادارے کے ساتھ تعاون نہایت اہم ہے۔

وزارتِ دفاع کے مطابق توقع ہے کہ یہ طیارے 2027 کے اختتام سے قبل سروس میں لائے جا سکیں گے، تاہم کسی بھی معاہدے کے لیے ڈنمارک کی پارلیمنٹ کی فنانس کمیٹی کی پیشگی منظوری درکار ہوگی۔