پاکستان اور ایران کا خواتین کے بااختیار بنانے کے شعبے میں تعاون بڑھانے پر زور

Read Time:2 Minute, 1 Second

اسلام آباد، یورپ ٹوڈے: وفاقی وزیر قانون، انصاف و انسانی حقوق سینیٹر اعظم نذیر تارڑ نے ایران کے ساتھ دوطرفہ تعاون کو مزید فروغ دینے پر زور دیتے ہوئے خواتین کو بااختیار بنانے کے شعبے میں قریبی اشتراک اور مختلف شعبوں میں خواتین کی شمولیت بڑھانے کے حوالے سے ایران کے تجربات سے استفادہ کرنے کی خواہش کا اظہار کیا ہے۔

یہ بات انہوں نے اتوار کو اسلام آباد میں منعقدہ اسلامی تعاون تنظیم (او آئی سی) کی خواتین کی ترقی سے متعلق نویں وزارتی کانفرنس کے موقع پر ایران کی نائب صدر برائے خواتین و خاندانی امور زہرا بہروز آذر سے ملاقات کے دوران کہی۔

ملاقات میں سینیٹر اعظم نذیر تارڑ نے ایران کے لیے پاکستان کی حمایت کا اعادہ کرتے ہوئے کہا کہ پاکستان گزشتہ سال کے 12 روزہ تنازع اور حالیہ کشیدگی کے دوران بھی ایران کے ساتھ کھڑا رہا اور ایران کے خلاف ہونے والے حملوں کی مذمت کرتا ہے۔

وفاقی وزیر نے خواتین کے مسائل کے حوالے سے او آئی سی کے ایجنڈے کو آگے بڑھانے اور مسلم معاشروں کو درپیش مشترکہ چیلنجز سے نمٹنے میں ایران کے کردار کو سراہا۔ انہوں نے کہا کہ او آئی سی کے رکن ممالک کو خواتین سے متعلق مسلم معاشروں کی مغربی میڈیا کے بعض حلقوں میں پیش کی جانے والی متعصبانہ تصویر کا مؤثر جواب دینے کے لیے باہمی تعاون کو مزید مضبوط بنانا چاہیے۔

اعظم نذیر تارڑ نے پاکستان اور ایران کے درمیان قریبی تعاون کی ضرورت پر زور دیتے ہوئے فلسطین، غزہ، افغانستان اور کشمیر میں ظلم و جبر اور قبضے کے حالات کا سامنا کرنے والی خواتین کی آواز عالمی سطح پر مؤثر انداز میں اجاگر کرنے کے لیے مشترکہ کوششوں کی ضرورت پر بھی زور دیا۔

اس موقع پر ایران کی نائب صدر زہرا بہروز آذر نے حالیہ تنازع کے دوران ایران کی حمایت پر حکومت پاکستان اور پاکستانی عوام کا شکریہ ادا کیا۔ انہوں نے کہا کہ اسلامی دنیا میں خواتین کے بارے میں منفی بیانیوں کا مقابلہ کرنے کے لیے مسلم ممالک کو مشترکہ اور مربوط حکمت عملی اپنانا ہوگی۔

زہرا بہروز آذر نے سیاسی، اقتصادی، تعلیمی، صحت اور سماجی شعبوں میں خواتین کی شرکت بڑھانے اور ان کی ترقی کے لیے ایران کی پیش رفت کا بھی ذکر کیا۔ انہوں نے پاکستان اور دیگر او آئی سی رکن ممالک کے ساتھ خواتین کی ترقی اور بااختیار بنانے سے متعلق مشترکہ اہداف کے حصول کے لیے تعاون مزید گہرا کرنے کے عزم کا اظہار کیا۔