خضدار میں دہشتگردوں کے خلاف کامیاب آپریشن پر صدر اور وزیرِ اعظم کا سیکیورٹی فورسز کو خراجِ تحسین

Read Time:1 Minute, 37 Second

اسلام آباد، یورپ ٹوڈے: صدرِ مملکت آصف علی زرداری اور وزیرِ اعظم محمد شہباز شریف نے بلوچستان کے ضلع خضدار کے علاقے نال (بسیمہ ڈسٹرکٹ) میں بھارتی سرپرست ’’فتنہ الہندستان‘‘ سے تعلق رکھنے والے دہشتگردوں کے خلاف کامیاب انٹیلی جنس بیسڈ آپریشن (IBO) پر سیکیورٹی فورسز کو خراجِ تحسین پیش کیا ہے۔

ایوانِ صدر کے میڈیا ونگ کے مطابق صدرِ مملکت نے کہا کہ بروقت اور مؤثر کارروائی نے دہشتگردوں کے ناپاک عزائم کو ناکام بنایا، جو ریاستی اداروں کی پیشہ ورانہ مہارت اور دہشتگردی کے خلاف قوم کے غیر متزلزل عزم کی عکاس ہے۔

صدر آصف علی زرداری نے سیکیورٹی فورسز کی بہادری اور قربانیوں کو سراہتے ہوئے 14 بھارتی حمایت یافتہ دہشتگردوں کے خاتمے پر انہیں خراجِ تحسین پیش کیا۔ انہوں نے کہا کہ ملک دشمن عناصر کے خلاف کارروائیاں قومی سلامتی، امن اور استحکام کے لیے ناگزیر ہیں۔

انہوں نے اس آپریشن کے دوران پاک فوج کے لانس حوالدار محمد عباس کی شہادت پر گہرے دکھ اور افسوس کا اظہار کرتے ہوئے کہا کہ وطن کے دفاع کے لیے جان قربان کرنے والے بہادر سپوتوں کی قربانیاں ہمیشہ یاد رکھی جائیں گی۔

دوسری جانب وزیراعظم شہباز شریف نے بھی سیکیورٹی فورسز کی کامیاب کارروائی میں 14 دہشتگردوں کو ہلاک کرنے پر ان کی پیشہ ورانہ صلاحیتوں کو سراہا۔

وزیرِ اعظم آفس میڈیا ونگ کے مطابق وزیراعظم نے آپریشن کے دوران بہادری سے لڑتے ہوئے شہید ہونے والے پاک فوج کے لانس حوالدار محمد عباس کو خراجِ عقیدت پیش کیا اور ان کے درجات کی بلندی کے لیے دعا کی۔ انہوں نے شہید کے اہل خانہ سے دلی ہمدردی اور تعزیت کا اظہار بھی کیا۔

وزیرِ اعظم نے کہا کہ ’’عزمِ استحکام‘‘ کے وژن کے تحت سیکیورٹی فورسز دہشتگردی کے خلاف جنگ میں نمایاں کامیابیاں حاصل کر رہی ہیں۔

انہوں نے اس عزم کا اعادہ کیا کہ حکومت ملک سے ہر قسم کی دہشتگردی کے مکمل خاتمے کے لیے پرعزم ہے اور اس مقصد کے حصول تک کارروائیاں جاری رہیں گی۔