یومِ اقبال کے موقع پر وزیراعظم کا شاعرِ مشرق علامہ محمد اقبال کو خراجِ عقیدت

Read Time:2 Minute, 6 Second

اسلام آباد، یورپ ٹوڈے: وزیرِاعظم محمد شہباز شریف نے یومِ اقبال (21 اپریل) کے موقع پر پوری قوم کی جانب سے شاعرِ مشرق، مفکرِ اسلام و پاکستان، علامہ محمد اقبال کو خراجِ عقیدت پیش کرتے ہوئے کہا ہے کہ وہ برصغیر کے مسلمانوں کے محسن اور ایک عظیم فکری رہنما تھے۔

وزیراعظم نے اپنے پیغام میں کہا کہ علامہ اقبال نے خودی، عمل، یقین اور فکری آزادی کا پیغام دیا۔ ان کے افکار نے ایک محکوم قوم کو شعور، خود اعتمادی اور مسلسل جدوجہد کا احساس عطا کیا۔

انہوں نے کہا کہ آج کے قومی اور عالمی حالات میں علامہ اقبال کا پیغام غیر معمولی اہمیت کا حامل ہے۔ فکری انتشار، انتہاپسندی اور معاشرتی عدم برداشت کے چیلنجز سے نمٹنے کے لیے ہمیں اپنی انفرادی اور اجتماعی زندگیوں کو علامہ اقبال کی فکری تربیت کی روشنی میں استوار کرنا ہوگا۔ علامہ اقبال نے محبت، اخوت اور قومی شعور کو زندگی کا مقصد قرار دیا۔

وزیراعظم نے کہا کہ علامہ اقبال کے تصورات کی روشنی میں امن، اتحاد، علم، کردار اور انصاف کی مضبوط بنیادوں پر قائم پاکستان ہی ہمارا مستقبل ہے۔ حکومتِ پاکستان دہشت گردی، انتہاپسندی اور فرقہ واریت کے مکمل خاتمے اور ایک معتدل و ہم آہنگ معاشرے کے قیام کے لیے پرعزم ہے۔

انہوں نے کہا کہ علامہ اقبال نے نوجوان نسل کی تربیت پر خصوصی توجہ دی اور انہیں قوم کا سرمایہ اور مستقبل کا معمار قرار دیا۔ نئی نسل کو علم، ہنر، کردار، خودمختاری اور حب الوطنی سے آراستہ کرنا قومی مستقبل کے لیے ناگزیر ہے۔

وزیراعظم نے مزید کہا کہ حکومت کا ماننا ہے کہ فکری، اخلاقی اور قومی بنیادوں پر تعلیم کی تعمیر کے بغیر قومی ترقی کا خواب شرمندۂ تعبیر نہیں ہو سکتا۔ اسی نظریے کے تحت نوجوانوں کو بااختیار بنانے، انہیں جدید مہارتوں سے لیس کرنے اور قومی ترقی میں ان کے کردار کو مضبوط بنانے کے لیے ضروری اقدامات کیے جا رہے ہیں۔

انہوں نے کہا کہ اگر پاکستان کے نوجوان اقبال کے افکار کی روشنی میں رہنمائی حاصل کریں تو وہ ملک کو ترقی، استحکام اور وقار کی نئی بلندیوں تک لے جا سکتے ہیں۔ علامہ اقبال نے نوجوانوں کے ساتھ ساتھ پوری قوم کو امید اور مسلسل ترقی کا درس دیا۔

وزیراعظم نے اپنے پیغام کے اختتام پر کہا کہ یومِ اقبال کے موقع پر ہمیں عہد کرنا چاہیے کہ ہم اقبال کے افکار کو اپنی قومی پالیسی، تعلیمی ترجیحات اور اجتماعی سوچ کا حصہ بنائیں گے اور ایک ایسے پاکستان کی تعمیر کے لیے کام کریں گے جو روشن مستقبل کی ضمانت ہو۔ انشاء اللہ۔