وزیراعظم شہباز شریف کا بلوچستان میں کامیاب کارروائیوں پر سیکیورٹی فورسز کو خراجِ تحسین
Read Time:1 Minute, 23 Second
کراچی، یورپ ٹوڈے: وزیراعظم محمد شہباز شریف نے بلوچستان کے اضلاع خاران اور مستونگ میں فتنہ الہندوستان سے تعلق رکھنے والے دہشت گردوں کے خلاف کامیاب کارروائیوں پر سیکیورٹی فورسز کو زبردست خراجِ تحسین پیش کرتے ہوئے کہا ہے کہ دہشت گردی کے مکمل خاتمے تک ان عناصر کے خلاف آپریشنز بلا تعطل جاری رہیں گے۔
وزیراعظم آفس کے میڈیا ونگ کی جانب سے جاری بیان کے مطابق وزیراعظم نے کہا کہ بہادر سیکیورٹی فورسز نے فتنہ الہندوستان سے وابستہ آٹھ دہشت گردوں کو ہلاک کرکے ان کے مذموم دہشت گردانہ عزائم کو ناکام بنایا ہے۔
انہوں نے اس عزم کا اعادہ کیا کہ فتنہ الہندوستان سے وابستہ دہشت گردوں کے خلاف کارروائیاں اپنے منطقی انجام تک جاری رہیں گی اور ان کے نیٹ ورک کو مکمل طور پر ختم کیا جائے گا۔
وزیراعظم شہباز شریف نے کہا کہ حکومت ملک سے فتنہ الہندوستان سمیت ہر قسم کی دہشت گردی کے مکمل خاتمے تک اپنی کوششیں جاری رکھے گی اور دہشت گرد عناصر کے خلاف کارروائیوں میں کوئی کمی نہیں آنے دی جائے گی۔
انہوں نے دہشت گردی کے خلاف جنگ میں سیکیورٹی فورسز کی لازوال قربانیوں کو خراجِ عقیدت پیش کرتے ہوئے کہا کہ ان کی خدمات ہمیشہ یاد رکھی جائیں گی۔ انہوں نے کہا کہ پوری قوم اپنی مسلح افواج اور سیکیورٹی اداروں کے شانہ بشانہ کھڑی ہے اور دہشت گردی کے خلاف جنگ میں ان کی مکمل حمایت جاری رکھے گی۔
وزیراعظم نے اس عزم کا اظہار کیا کہ پاکستان کے امن کو نقصان پہنچانے والے عناصر کو ہر محاذ پر عبرتناک شکست کا سامنا کرنا پڑے گا اور ملک کے امن و استحکام کے خلاف ہر سازش کو ناکام بنایا جائے گا۔
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0 