پشاور میں نجی اسکول کی چھت گرنے سے 34 بچوں سمیت 35 افراد جاں بحق
Read Time:1 Minute, 37 Second
پشاور، یورپ ٹوڈے: پشاور کے علاقے دیر کالونی میں تین منزلہ نجی اسکول کی چھت گرنے کے نتیجے میں 34 بچوں اور ایک خاتون ٹیچر سمیت کم از کم 35 افراد جاں بحق ہو گئے، جبکہ متعدد افراد زخمی ہو گئے۔ جاں بحق ہونے والے بچوں میں چھ بچیاں بھی شامل ہیں۔
اسپتال انتظامیہ کے مطابق جاں بحق افراد میں سے 33 کی لاشیں لیڈی ریڈنگ اسپتال جبکہ دو لاشیں نصیر اللہ بابر میموریل اسپتال منتقل کی گئیں۔
کیپیٹل سٹی پولیس آفیسر (سی سی پی او) میاں سعید نے واقعے کی تصدیق کرتے ہوئے بتایا کہ نجی اسکول کے مالک کو گرفتار کر لیا گیا ہے۔
ریسکیو حکام کے مطابق انہیں صبح 8 بج کر 48 منٹ پر اسکول کی چھت گرنے کی اطلاع موصول ہوئی، جس کے بعد امدادی ٹیمیں فوری طور پر جائے وقوعہ پر پہنچ گئیں اور ملبے تلے دبے افراد کو نکالنے کے لیے ریسکیو آپریشن شروع کر دیا۔
ریسکیو حکام کا کہنا ہے کہ زخمیوں میں سے 20 افراد کو لیڈی ریڈنگ اسپتال جبکہ 33 کو نصیر اللہ بابر میموریل اسپتال منتقل کیا گیا۔ زخمیوں میں متعدد کی حالت تشویش ناک بتائی گئی ہے۔ حکام کے مطابق ملبے تلے دبے تمام افراد کو نکال لیا گیا ہے۔
تحقیقاتی کمیٹی قائم
دریں اثنا، ڈپٹی کمشنر پشاور نے واقعے کی تحقیقات اور چھت گرنے کی وجوہات کا تعین کرنے کے لیے تحقیقاتی کمیٹی تشکیل دے دی ہے۔
کمیٹی واقعے کے تمام پہلوؤں کا جائزہ لے گی اور اس بات کا تعین کرے گی کہ اسکول کی چھت گرنے کے اسباب کیا تھے۔
علاوہ ازیں، سیکرٹری تعلیم عنایت اللہ وسیم نے واقعے کا نوٹس لیتے ہوئے پرائیویٹ اسکولز ریگولیٹری اتھارٹی (پی ایس آر اے) کے منیجنگ ڈائریکٹر کو ہدایت کی ہے کہ وہ اگلے روز تک تحقیقاتی رپورٹ پیش کریں۔
تحقیقات کے ذریعے عمارت کی تعمیر، حفاظتی انتظامات اور متعلقہ ضوابط پر عمل درآمد میں ممکنہ کوتاہیوں کا تعین کیا جائے گا تاکہ حادثے کی اصل وجوہات سامنے لائی جا سکیں۔
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0 
