دوسرے ٹیسٹ میں لٹن داس کی شاندار سنچری، بنگلادیش 26 رنز پر 6 وکٹیں گنوانے کے باوجود 262 رنز بنانے میں کامیاب
راولپنڈی، یورپ ٹوڈے: بنگلادیشی بیٹرز نے دوسرے ٹیسٹ میچ میں مشکل صورتحال کے باوجود شاندار کارکردگی کا مظاہرہ کرتے ہوئے 262 رنز بنالیے۔ لٹن داس نے 138 رنز کی یادگار اننگز کھیل کر ٹیم کو بحران سے نکالا۔
بنگلادیش نے پاکستان کے خلاف ٹاس جیت کر پہلے فیلڈنگ کا فیصلہ کیا۔ پاکستان کی پہلی اننگز کے 274 رنز کے جواب میں، بنگلادیش کی ٹیم نے تیسرے دن کے کھیل کے دوران 26 رنز پر 6 وکٹیں گنوا دیں۔ اس موقع پر لٹن داس اور مہدی حسن میراز نے 165 رنز کی قیمتی شراکت قائم کی۔ مہدی حسن نے 78 رنز بنائے جبکہ لٹن داس نے 4 چھکوں اور 13 چوکوں کی مدد سے 138 رنز بنائے۔
پاکستان کی جانب سے خرم شہزاد نے بہترین گیندبازی کرتے ہوئے 6 وکٹیں حاصل کیں، جبکہ میر حمزہ نے 2 وکٹیں لیں۔ اسپنر ابرار احمد کوئی وکٹ لینے میں کامیاب نہ ہو سکے۔
پاکستان کی دوسری اننگز کا آغاز بھی مایوس کن رہا، عبداللہ شفیق صرف 3 رنز بنا کر آؤٹ ہوئے جبکہ خرم شہزاد نائٹ واچ مین کے طور پر بیٹنگ کرتے ہوئے بغیر کوئی رن بنائے پویلین لوٹ گئے۔ پاکستان نے دن کے اختتام پر 2 وکٹوں کے نقصان پر 9 رنز بنائے، اور مہمان ٹیم پر 21 رنز کی برتری حاصل کی۔
واضح رہے کہ پہلے ٹیسٹ میچ میں پاکستان کو بنگلادیش نے 10 وکٹوں سے شکست دی تھی، اور اس میچ میں پاکستانی ٹیم میں دو تبدیلیاں کی گئیں، جس میں شاہین شاہ آفریدی اور نسیم شاہ کو ڈراپ کر کے میر حمزہ اور ابرار احمد کو شامل کیا گیا۔
