امریکی نائب صدر جے ڈی وینس، خصوصی ایلچی اسٹیو وٹکوف اور جیرڈ کشنر ’اسلام آباد مذاکرات‘ کے لیے پاکستان پہنچ گئے
Read Time:1 Minute, 58 Second
اسلام آباد، یورپ ٹوڈے: امریکہ کے نائب صدر جے ڈی وینس ہفتہ کے روز ایک اعلیٰ سطحی امریکی وفد کے ہمراہ اسلام آباد پہنچ گئے، جہاں وہ ایران کے ساتھ جنگ بندی اور امن مذاکرات کے سلسلے میں منعقد ہونے والے “اسلام آباد مذاکرات 2026” میں شرکت کریں گے۔ دفترِ خارجہ کے مطابق امریکی وفد میں صدر ڈونلڈ ٹرمپ کے مشرقِ وسطیٰ کے خصوصی ایلچی اسٹیو وٹکوف اور جیرڈ کشنر بھی شامل ہیں۔
امریکی وفد کا استقبال نائب وزیر اعظم و وزیر خارجہ اسحاق ڈار، چیف آف ڈیفنس فورسز و آرمی چیف فیلڈ مارشل سید عاصم منیر، وفاقی وزیر داخلہ محسن نقوی اور امریکہ کی ناظم الامور نیٹلی بیکر نے کیا۔
اس موقع پر اسحاق ڈار نے خطے اور دنیا میں دیرپا امن و استحکام کے لیے امریکہ کے عزم کو سراہتے ہوئے امید ظاہر کی کہ فریقین تعمیری انداز میں مذاکرات کریں گے۔ انہوں نے اس عزم کا اعادہ کیا کہ پاکستان تنازع کے پائیدار حل کے لیے اپنا سہولت کار کردار جاری رکھے گا۔
جے ڈی وینس نے روانگی سے قبل مذاکرات کے حوالے سے امید کا اظہار کرتے ہوئے کہا کہ امریکہ ایران کے ساتھ مثبت اور نتیجہ خیز بات چیت کا خواہاں ہے۔ ان کا کہنا تھا کہ اگر ایران خلوصِ نیت کے ساتھ مذاکرات میں شریک ہوتا ہے تو پیش رفت ممکن ہے، تاہم کسی بھی غیر سنجیدہ رویے کا مناسب جواب دیا جائے گا۔
دوسری جانب ایرانی وفد بھی جمعہ کی شب اسلام آباد پہنچ گیا، جس کی قیادت ایرانی پارلیمنٹ کے اسپیکر محمد باقر قالیباف کر رہے ہیں، جبکہ وفد میں وزیر خارجہ عباس عراقچی بھی شامل ہیں۔ ایرانی وفد کا استقبال بھی اعلیٰ پاکستانی قیادت نے کیا، جن میں اسحاق ڈار، اسپیکر قومی اسمبلی سردار ایاز صادق، محسن نقوی اور فیلڈ مارشل سید عاصم منیر شامل تھے۔
دفتر خارجہ کے مطابق پاکستان ایک نہایت اہم اور فیصلہ کن سفارتی عمل کی میزبانی کر رہا ہے، جہاں امریکہ اور ایران کے اعلیٰ سطحی وفود چھ ہفتوں سے جاری جنگ کے بعد مذاکرات کے ذریعے تنازع کے خاتمے کی کوشش کریں گے۔ اس جنگ میں ہزاروں افراد جاں بحق ہو چکے ہیں جبکہ مشرق وسطیٰ میں توانائی کی فراہمی متاثر ہونے سے عالمی معیشت بھی شدید دباؤ کا شکار ہوئی ہے۔
اسلام آباد میں ہونے والے یہ مذاکرات نہ صرف خطے بلکہ عالمی سطح پر امن و استحکام کے لیے ایک اہم پیش رفت ثابت ہو سکتے ہیں۔
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0 
