انڈونیشیا میں ’’ریڈ اینڈ وائٹ‘‘ پروگرام کے تحت 16 مئی کو ایک ہزار دیہی کوآپریٹو اداروں کا آغاز کیا جائے گا
Read Time:1 Minute, 38 Second
جکارتہ، یورپ ٹوڈے: انڈونیشیا کی حکومت 16 مئی کو ’’ریڈ اینڈ وائٹ‘‘ پروگرام کے تحت ایک ہزار دیہی کوآپریٹو اداروں کا افتتاح کرے گی، جو ملک بھر میں 25 ہزار یونٹس کے قیام کے وسیع منصوبے کا حصہ ہیں۔ یہ بات وزیرِ کوآپریٹو فیری جولیانتونو نے پیر کو جکارتہ میں صحافیوں سے گفتگو کرتے ہوئے کہی۔
انہوں نے بتایا کہ تقریباً 7 ہزار 200 مکمل شدہ یونٹس میں سے ایک ہزار کوآپریٹو ادارے افتتاح کے لیے تیار ہیں، جن میں گودام، آؤٹ لیٹس اور ضروری آلات شامل ہیں۔
وزیرِ کوآپریٹو کے مطابق ان منصوبوں کی تعمیر سرکاری فوڈ کمپنی “اگریناس پانگان نوسانتارا” انڈونیشی فوج کے تعاون سے کر رہی ہے۔
انہوں نے کہا کہ حکومت مشرقی جاوا کے علاقے نگانجوک میں افتتاحی تقریب منعقد کرنے کا ارادہ رکھتی ہے، تاہم اعلیٰ حکام کے ساتھ مشاورت کے بعد اس منصوبے میں تبدیلی بھی ممکن ہے۔
فیری جولیانتونو نے بتایا کہ اس وقت تقریباً 25 ہزار کوآپریٹو اداروں پر تعمیراتی کام جاری ہے، جبکہ بعض یونٹس جلد از جلد کام شروع کر دیں گے۔
انہوں نے تاخیر سے متعلق خدشات کو مسترد کرتے ہوئے کہا کہ منصوبے پر مرحلہ وار عملدرآمد کیا جا رہا ہے اور ابتدائی مرحلے میں صرف ایک ہزار یونٹس افتتاح کے لیے تیار ہیں۔
بھرتیوں کے حوالے سے انہوں نے بتایا کہ تقریباً 30 ہزار کوآپریٹو مینیجرز کے استعداد جانچنے کے لیے امتحانات جاری ہیں، جن کے حتمی نتائج 7 جون کو جاری کیے جائیں گے۔
منتخب امیدواروں کو فوجی طرز کی تربیت دی جائے گی، انہیں ریزرو فورس کا حصہ بنایا جائے گا اور ذمہ داریاں سنبھالنے سے قبل انتظامی امور سے متعلق خصوصی بریفنگ بھی دی جائے گی۔
صدر پرابوو سوبیانتو نے دیہی معیشت کو فروغ دینے، روزگار کے مواقع پیدا کرنے، بنیادی اشیاء تک رسائی بہتر بنانے، مہنگائی پر قابو پانے اور کسانوں کی آمدن بڑھانے کے لیے اس پروگرام کا آغاز کیا تھا۔
ہر کوآپریٹو ادارے میں انتظامی دفتر، گودام، کلینک، فارمیسی اور کریانہ اسٹور قائم کیا جائے گا۔
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0 
