وزیر داخلہ محسن نقوی کی بلوچستان میں 21 دہشت گردوں کی ہلاکت پر سکیورٹی فورسز کو خراجِ تحسین
Read Time:1 Minute, 17 Second
اسلام آباد، یورپ ٹوڈے: وفاقی وزیر داخلہ محسن نقوی نے بلوچستان کے اضلاع چاغی اور پشین میں مختلف کارروائیوں کے دوران 21 دہشت گردوں کو ہلاک کرنے پر سکیورٹی فورسز کو خراجِ تحسین پیش کیا ہے۔
وزیر داخلہ نے دہشت گردوں کے خلاف کامیاب کارروائیوں پر سکیورٹی فورسز کی پیشہ ورانہ صلاحیتوں کو سراہتے ہوئے کہا کہ فورسز نے ’فتنۃ الہندوستان‘ اور ’فتنۃ الخوارج‘ سے وابستہ دہشت گردوں کے خلاف مؤثر کارروائیاں کیں۔
محسن نقوی نے کسٹمز ہاؤس پر دہشت گرد حملہ ناکام بناتے ہوئے شہادت پانے والے کسٹمز اہلکاروں سمیت 6 بہادر سپوتوں کو بھی خراجِ عقیدت پیش کیا۔
انہوں نے کہا کہ شہداء نے کسٹمز ہاؤس پر حملے کو ناکام بنانے کے لیے اپنی جانوں کا نذرانہ پیش کیا۔ ان کی عظیم قربانیاں دہشت گردی کے خاتمے کے لیے قوم کے غیر متزلزل عزم کی عکاس ہیں۔
وزیر داخلہ نے کہا کہ سکیورٹی فورسز بلوچستان میں امن و استحکام کے قیام کو یقینی بنانے کے لیے پرعزم ہیں اور دہشت گردوں کے مذموم عزائم کو ناکام بنانے پر فورسز کے اہلکار قابلِ تحسین ہیں۔
محسن نقوی نے کہا، ’’میں دہشت گردوں کے مذموم عزائم ناکام بنانے والے سکیورٹی فورسز کے بہادر جوانوں کو سلام پیش کرتا ہوں۔‘‘
انہوں نے زور دیا کہ دہشت گردوں اور ان کے سہولت کاروں کا مکمل خاتمہ پوری قوم کا مطالبہ ہے۔
وزیر داخلہ نے کہا کہ دہشت گردی کے خلاف جنگ میں پوری قوم سکیورٹی فورسز کے شانہ بشانہ کھڑی ہے اور ملک سے اس ناسور کے خاتمے کے لیے جاری کوششوں کی بھرپور حمایت جاری رکھے گی۔
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0 
