اسحاق ڈار کی ایندھن ریلیف اسکیم پر ادائیگیاں 24 گھنٹوں میں نمٹانے کی ہدایت

16 ستمبر, 202616 ستمبر, 2026

Read Time:1 Minute, 30 Second

اسلام آباد، یورپ ٹوڈے: نائب وزیراعظم و وزیر خارجہ سینیٹر محمد اسحاق ڈار نے ہدایت کی ہے کہ پٹرول پمپس کو ادائیگیاں اسٹیٹ بینک آف پاکستان کے ذریعے 24 گھنٹوں کے اندر مکمل کی جائیں، جبکہ صوبوں کو مستحق افراد تک ریلیف کی بلاتعطل فراہمی یقینی بنانے کے لیے ضلعی سطح پر آگاہی اور رابطہ کاری کا عمل مکمل کرنے کی ہدایت کی گئی ہے۔

نائب وزیراعظم نے یہ ہدایات قومی سطح پر ایندھن سبسڈی سے متعلق نیشنل اسٹیئرنگ کمیٹی کے نویں اجلاس کی صدارت کرتے ہوئے دیں۔ اجلاس میں وزیراعظم کی خصوصی ریلیف اسکیم کے ملک گیر اجرا اور اس کے انتظامات کا جائزہ لیا گیا۔

وزیراعظم کے دفتر سے جاری بیان کے مطابق اسلام آباد میں کامیاب پائلٹ منصوبے کے بعد کمیٹی نے اسکیم کو ملک بھر میں شروع کرنے کے انتظامات کو حتمی شکل دے دی ہے۔

اس اسکیم کے تحت موٹر سائیکلوں، تین پہیوں والی گاڑیوں اور 800 سی سی تک کی گاڑیوں، جن میں لوڈرز اور پک اپس بھی شامل ہیں، کے مالکان کو ریلیف فراہم کیا جائے گا، جبکہ اسکیم کی مکمل مالی لاگت وفاقی حکومت برداشت کرے گی۔

ملک بھر میں اسکیم کے لیے رجسٹریشن کا عمل ایس ایم ایس کے ذریعے 9771 پر جاری ہے، جبکہ فیول ٹوکن کے عوض رعایتی ایندھن کے حصول کا عمل بدھ اور جمعرات کی درمیانی شب سے شروع ہوگا۔

اجلاس میں وزیر اقتصادی امور، وزیر اطلاعات و نشریات، وزیر آئی ٹی و ٹیلی کمیونیکیشن، معاون خصوصی وزیراعظم برائے خزانہ و دیگر متعلقہ امور طارق باجوہ، پیٹرولیم اور آئی ٹی و ٹیلی کمیونیکیشن کے وفاقی سیکریٹریز، چیئرمین اوگرا، چیئرمین پی ٹی اے، خیبر پختونخوا اور بلوچستان کے چیف سیکریٹریز، پنجاب اور آزاد جموں و کشمیر کے ایڈیشنل چیف سیکریٹریز سمیت گلگت بلتستان، اسلام آباد کیپیٹل ٹیریٹری اور دیگر وفاقی و صوبائی محکموں کے اعلیٰ حکام نے شرکت کی۔