محسن نقوی کا مارگلہ روڈ–موٹروے منصوبے کا دورہ، سنگجانی انٹرچینج کی جلد تکمیل کی ہدایت

5 مئی, 20265 مئی, 2026

Read Time:1 Minute, 32 Second

اسلام آباد، یورپ ٹوڈے: وفاقی وزیر داخلہ محسن نقوی نے منگل کے روز مارگلہ روڈ–موٹروے توسیعی منصوبے کے سائٹ کا دورہ کیا اور جاری تعمیراتی کاموں کا تفصیلی جائزہ لیا۔

دورے کے دوران انہیں منصوبے کے مختلف حصوں پر بریفنگ دی گئی۔ حکام کے مطابق شہریوں کو تیز اور سہل سفری سہولیات فراہم کرنے کے لیے ایک اہم انفراسٹرکچر منصوبے پر باضابطہ کام شروع کر دیا گیا ہے، جس کے تحت مارگلہ روڈ کو براہِ راست موٹروے سے منسلک کیا جا رہا ہے۔

تفصیلات کے مطابق 2.7 کلومیٹر طویل اس منصوبے میں دونوں اطراف تین تین لین کی سڑک تعمیر کی جائے گی جبکہ دو لین پر مشتمل سروس روڈ بھی شامل ہوگی۔ منصوبے میں جی ٹی روڈ پر انٹرچینج، دو انڈر پاسز اور ایک پل بھی تعمیر کیا جائے گا تاکہ ٹریفک کی روانی کو بہتر بنایا جا سکے۔

وزیر داخلہ محسن نقوی نے ہدایت کی کہ جی ٹی روڈ پر واقع سنگجانی انٹرچینج کو 31 جولائی تک ہر صورت مکمل کیا جائے۔ انہوں نے کہا کہ یہ نیا رابطہ راستہ اسلام آباد اور موٹروے کے درمیان ایک تیز، متبادل اور آسان سفری آپشن فراہم کرے گا، جس سے ٹریفک کی بھیڑ اور سفر کے وقت میں نمایاں کمی آئے گی۔

انہوں نے مزید کہا کہ تمام دستیاب وسائل کو بروئے کار لاتے ہوئے منصوبے کو مقررہ مدت میں مکمل کیا جائے، جبکہ ہر حکومتی منصوبے میں معیار، شفافیت اور رفتار کو یقینی بنایا جا رہا ہے۔ شہریوں کو بہتر اور تیز سفری سہولیات فراہم کرنا حکومت کی اولین ترجیح ہے۔

بریفنگ میں بتایا گیا کہ منصوبے کی مجموعی تکمیل دسمبر 2026 تک متوقع ہے جبکہ باقی 2.5 کلومیٹر حصہ پنجاب حکومت کے تحت مکمل کیا جائے گا۔

دورے کے موقع پر چیئرمین سی ڈی اے، آئی جی اسلام آباد پولیس، ڈپٹی کمشنر اسلام آباد اور دیگر متعلقہ حکام بھی موجود تھے۔