مظفرآباد کے قریب پاک فوج کا ایم آئی-17 ہیلی کاپٹر حادثے کا شکار، تمام عملہ شہید

Read Time:1 Minute, 53 Second

مظفرآباد، یورپ ٹوڈے: پاک فوج کا ایوی ایشن ایم آئی-17 ہیلی کاپٹر بدھ کے روز مظفرآباد کے قریب پرواز کے دوران تکنیکی خرابی کے باعث حادثے کا شکار ہو گیا، جس کے نتیجے میں طیارے میں سوار تمام اہلکار شہید ہو گئے۔

پاک فوج کے شعبۂ تعلقات عامہ (آئی ایس پی آر) کے مطابق حادثے میں کوئی بھی شخص زندہ نہ بچ سکا۔ واقعے کے فوراً بعد ریسکیو اور امدادی ٹیمیں جائے حادثہ کی جانب روانہ کی گئیں اور موقع پر پہنچ کر امدادی و ریکوری کارروائیاں شروع کر دی گئیں۔

آئی ایس پی آر نے بتایا کہ حادثے کی اصل تکنیکی وجوہات جاننے کے لیے ایک انکوائری بورڈ تشکیل دے دیا گیا ہے جو واقعے کی مکمل تحقیقات کرے گا۔

دوسری جانب چیف آف ڈیفنس فورسز اور چیف آف آرمی اسٹاف فیلڈ مارشل سید عاصم منیر سمیت پاک فوج کے تمام رینکس نے حادثے میں قیمتی جانوں کے ضیاع پر گہرے رنج و غم کا اظہار کیا ہے۔

فوجی ترجمان کے مطابق عسکری قیادت نے شہداء کے اہل خانہ سے دلی ہمدردی اور تعزیت کا اظہار کرتے ہوئے اس مشکل گھڑی میں ان کے لیے صبر و استقامت کی دعا کی ہے۔

صدرِ مملکت آصف علی زرداری نے بھی مظفرآباد کے قریب پاک فوج کے ایم آئی-17 ہیلی کاپٹر حادثے پر افسوس کا اظہار کرتے ہوئے شہید اہلکاروں کو خراجِ عقیدت پیش کیا اور ان کے اہل خانہ سے تعزیت کی۔ انہوں نے کہا کہ پوری قوم غمزدہ خاندانوں کے ساتھ کھڑی ہے اور ملک کے بہادر سپاہیوں کی قربانیوں کو خراجِ تحسین پیش کرتی ہے۔

وزیرِاعظم شہباز شریف نے بھی حادثے پر گہرے دکھ اور افسوس کا اظہار کرتے ہوئے شہداء کو خراجِ عقیدت پیش کیا۔ انہوں نے کہا کہ پوری قوم اپنے بہادر سپاہیوں کی قربانیوں کو سلام پیش کرتی ہے۔ وزیراعظم نے شہداء کے درجات کی بلندی اور لواحقین کے لیے صبر و حوصلے کی دعا کی۔

وفاقی وزیر داخلہ محسن نقوی نے بھی مظفرآباد کے قریب ہیلی کاپٹر حادثے پر گہرے رنج و غم کا اظہار کیا۔ وزارت داخلہ کی جانب سے سوشل میڈیا پلیٹ فارم ایکس پر جاری بیان میں انہوں نے شہداء کے اہل خانہ سے دلی تعزیت اور ہمدردی کا اظہار کرتے ہوئے کہا کہ “ہماری تمام تر ہمدردیاں شہداء کے خاندانوں کے ساتھ ہیں۔”