وزیراعظم شہباز شریف کی دانش اسکولوں کی تعمیر تیز کرنے کی ہدایت، معیار پر کوئی سمجھوتہ نہ کرنے کا حکم
Read Time:1 Minute, 47 Second
لاہور، یورپ ٹوڈے: وزیراعظم محمد شہباز شریف نے ملک بھر میں دانش اسکولوں کی تعمیر کا عمل تیز کرنے اور ان کی بروقت تکمیل یقینی بنانے کے لیے متعلقہ حکام کو چوبیس گھنٹے کام جاری رکھنے کی ہدایت کرتے ہوئے واضح کیا ہے کہ تعمیراتی معیار پر کسی قسم کا سمجھوتہ قابل قبول نہیں ہوگا۔
وزیراعظم نے ہفتہ کو ملک بھر میں دانش اسکولوں کی تعمیر پر پیش رفت کا جائزہ لینے کے لیے منعقدہ اجلاس کی صدارت کرتے ہوئے کہا کہ ہمارے بچے ملک کا مستقبل ہیں اور دانش اسکول روشن مستقبل کی تعمیر کے لیے ایک اہم سرمایہ کاری کی حیثیت رکھتے ہیں۔
انہوں نے کہا کہ ان تعلیمی اداروں میں داخلے صرف میرٹ کی بنیاد پر ملک کے غریب ترین اور مستحق خاندانوں کے بچوں کو دیے جائیں گے تاکہ انہیں معیاری تعلیم کے یکساں مواقع فراہم کیے جا سکیں۔
وزیراعظم نے متعلقہ حکام کو ہدایت کی کہ طلبہ کی تعلیم اور تربیت کے لیے جدید مصنوعی ذہانت (اے آئی) اور انفارمیشن ٹیکنالوجی (آئی ٹی) پر مبنی طریقہ کار اپنایا جائے تاکہ انہیں عصری تقاضوں سے ہم آہنگ علم اور مہارتوں سے آراستہ کیا جا سکے۔
انہوں نے دانش اسکولوں کے بنیادی ڈھانچے، تعلیمی و دیگر سہولیات اور فراہم کی جانے والی خدمات کے معیار کا جائزہ لینے کے لیے تھرڈ پارٹی ویلیڈیشن (آزادانہ جانچ) کرانے کا بھی حکم دیا۔
وزیراعظم نے وزارت مواصلات کو ہدایت کی کہ گلگت بلتستان اور آزاد جموں و کشمیر میں قائم کیے جانے والے دانش اسکولوں تک آسان رسائی کے لیے مؤثر اور معیاری سڑکوں کا نیٹ ورک قائم کیا جائے۔
انہوں نے خیبرپختونخوا کے ضم شدہ اضلاع (سابق فاٹا) میں دانش اسکولوں کے قیام کے لیے حکمت عملی بھی جلد از جلد پیش کرنے کی ہدایت کی۔
اجلاس کے دوران وزیراعظم کو گلگت بلتستان، آزاد جموں و کشمیر، سندھ اور بلوچستان میں دانش اسکولوں کی تعمیر پر ہونے والی پیش رفت کے بارے میں تفصیلی بریفنگ دی گئی۔
اجلاس میں وفاقی وزراء احسن اقبال، احد خان چیمہ، عطا اللہ تارڑ، شزا فاطمہ خواجہ اور ڈاکٹر مصدق ملک سمیت متعلقہ محکموں اور اداروں کے اعلیٰ حکام نے شرکت کی۔ اجلاس ویڈیو لنک کے ذریعے منعقد کیا گیا۔
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0 