اقوام متحدہ میں پاکستان کی ایران پر حملوں کی مذمت، بحرین اور روس کی قراردادوں کی حمایت
نیویارک، یورپ ٹوڈے: پاکستان نے اقوام متحدہ میں بحرین اور روس کی جانب سے پیش کی گئی قراردادوں کی حمایت کرتے ہوئے ایران پر امریکی اور اسرائیلی حملوں کی سخت مذمت کی ہے اور خطے میں بڑھتی ہوئی کشیدگی پر گہری تشویش کا اظہار کیا ہے۔
اقوام متحدہ میں پاکستان کے مستقل مندوب عاصم افتخار نے سلامتی کونسل سے خطاب کرتے ہوئے کہا کہ ایران پر حملوں نے عالمی امن و سلامتی کو خطرے میں ڈال دیا ہے۔ انہوں نے بتایا کہ متحدہ عرب امارات پر ایرانی حملوں کے نتیجے میں دو پاکستانی شہری بھی جاں بحق ہوئے ہیں، جو نہایت افسوسناک ہے۔
انہوں نے امید ظاہر کی کہ خلیجی ممالک کی سرزمین پر حملے فوری طور پر بند ہوں گے اور آبنائے ہرمز میں جہاز رانی کے حقوق اور آزادی کو نقصان نہیں پہنچایا جائے گا۔
عاصم افتخار نے کہا کہ خطے کے ممالک کو جنگ کے بدترین نتائج کا سامنا نہیں کرنا چاہیے تھا اور پاکستان ان کی حکومتوں اور عوام کے ساتھ مکمل یکجہتی کا اظہار کرتا ہے۔
انہوں نے مزید کہا کہ پاکستان روسی فیڈریشن کی جانب سے پیش کیے گئے مسودۂ قرارداد کو بھی مثبت نظر سے دیکھتا ہے، جو اقوام متحدہ کے منشور کے دائرۂ کار میں رہتے ہوئے مرتب کی گئی ہے۔
ان کے مطابق روسی قرارداد کا بنیادی مقصد فریقین پر زور دینا ہے کہ وہ فوری طور پر فوجی سرگرمیاں بند کریں، مزید کشیدگی سے گریز کریں اور مذاکرات کی میز پر واپس آئیں، اور یہ مؤقف پاکستان کے مجموعی مؤقف کے عین مطابق ہے۔
