متحدہ عرب امارات سے پاکستانیوں کی مخصوص بنیادوں پر بے دخلی کی خبریں بے بنیاد ہیں، وزارتِ داخلہ
Read Time:1 Minute, 9 Second
اسلام آباد، یورپ ٹوڈے: وزارتِ داخلہ نے متحدہ عرب امارات سے پاکستانی شہریوں کی مبینہ مخصوص بنیادوں پر بے دخلی سے متعلق سوشل میڈیا اور بعض ذرائع ابلاغ میں گردش کرنے والی خبروں کو بے بنیاد، گمراہ کن اور بدنیتی پر مبنی پروپیگنڈا قرار دے دیا ہے۔
وزارتِ داخلہ کی جانب سے جاری بیان میں کہا گیا ہے کہ معاملے کا تفصیلی جائزہ لینے کے بعد یہ واضح ہوا کہ اس نوعیت کی خبریں غلط فہمیاں پیدا کرنے اور مخصوص مفادات کو فائدہ پہنچانے کے لیے پھیلائی جا رہی ہیں۔
بیان کے مطابق متحدہ عرب امارات سمیت کسی بھی دوست ملک کی جانب سے پاکستانی شہریوں کو کسی خاص طبقے یا گروہ کی بنیاد پر بے دخل نہیں کیا جا رہا۔
وزارتِ داخلہ نے وضاحت کی کہ اگر کسی شہری کو واپس بھیجا جاتا ہے تو وہ متعلقہ ملک کے قوانین، ویزا شرائط، غیر قانونی دستاویزات یا قیام کی مدت ختم ہونے جیسے معاملات کے تحت معمول کی قانونی کارروائی کا حصہ ہوتا ہے۔
بیان میں مزید کہا گیا کہ پاکستانی شہری بدستور متحدہ عرب امارات اور دیگر دوست ممالک کے ویزوں اور روزگار کے مواقع سے فائدہ اٹھا رہے ہیں اور اس حوالے سے کسی قسم کی امتیازی پالیسی موجود نہیں ہے۔
وزارتِ داخلہ نے عوام سے اپیل کی کہ غیر مصدقہ خبروں اور افواہوں پر یقین نہ کریں اور معلومات کے لیے صرف مستند سرکاری ذرائع پر انحصار کریں۔
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0 
