پاکستان کی برآمدات بڑھانے کے لیے ایس ایم ایز کو ایکسپورٹ انشورنس کی سہولت خوش آئند ہے: وزیراعظم شہباز شریف

Read Time:2 Minute, 19 Second

لاہور، یورپ ٹوڈے: وزیراعظم محمد شہباز شریف نے ایکسپورٹ ڈویلپمنٹ فنڈ (EDF) اور ایکسپورٹ امپورٹ بینک آف پاکستان (EXIM Bank) کی جانب سے بالخصوص چھوٹے اور درمیانے درجے کے کاروباری اداروں (ایس ایم ایز) کے لیے برآمدی انشورنس کوریج کی فراہمی کا خیرمقدم کرتے ہوئے کہا ہے کہ اس اقدام سے ملک کی برآمدات میں اضافے میں مدد ملے گی۔

وزیراعظم نے ہفتہ کو ایکسپورٹ ڈویلپمنٹ فنڈ سے متعلق اجلاس کی صدارت کرتے ہوئے کہا کہ 3 ارب روپے کے رسک پول کے قیام سے برآمدی کریڈٹ انشورنس تک رسائی میں وسعت آئے گی، بالخصوص ایس ایم ایز اس سہولت سے مستفید ہوں گے، جس سے کاروباری برادری کو برآمدات کا حجم بڑھانے میں مدد ملے گی۔

انہوں نے اس اقدام کو ملک میں چھوٹے اور درمیانے درجے کے کاروبار کے فروغ کے لیے انتہائی خوش آئند قرار دیتے ہوئے قومی معیشت کو مستحکم بنانے کے لیے اصلاحات کے حوالے سے EDF کی ٹیم کی کاوشوں کو سراہا۔

وزیراعظم شہباز شریف نے کہا کہ تنظیم نو اور اصلاحات کے بعد ایکسپورٹ ڈویلپمنٹ فنڈ کی قیادت نجی شعبے کے ماہرین کے سپرد کی گئی ہے۔ انہوں نے کہا کہ EDF کے پاس دستیاب تمام فنڈز کاروباری برادری کو سہولت فراہم کرنے کے لیے استعمال کیے جا رہے ہیں۔

وزیراعظم نے کہا کہ یہ اقدامات حکومت پاکستان کے قومی معیشت کے فروغ اور برآمدات میں اضافے کے عزم کی عکاسی کرتے ہیں۔ انہوں نے کہا کہ اس نوعیت کے اقدامات پاکستان کو سرمایہ کاری کے لیے عالمی مرکز بنانے میں معاون ثابت ہوں گے۔

انہوں نے کہا کہ حکومت کی جانب سے کیے جانے والے اقدامات کا مقصد برآمدات پر مبنی معیشت کے فروغ کے عزم کو عملی جامہ پہنانا ہے۔

اجلاس کے دوران وزیراعظم کو ایکسپورٹ ڈویلپمنٹ فنڈ کی تنظیم نو اور اصلاحات کے حوالے سے تفصیلی بریفنگ دی گئی۔ اجلاس کو بتایا گیا کہ EDF کے پاس دستیاب مکمل 24 ارب روپے کاروباری برادری کو سہولت فراہم کرنے کے لیے سرمایہ کاری کی غرض سے مختص کر دیے گئے ہیں۔

اجلاس کو مزید بتایا گیا کہ انفراسٹرکچر پر کوئی اضافی اخراجات نہیں کیے جائیں گے، جبکہ EDF اقتصادی ترقی اور کاروباری سرگرمیوں کو سہولت دینے کے لیے تحقیق، ہنرمندی کے فروغ اور مسابقتی صلاحیت میں اضافے سے متعلق اقدامات کر رہا ہے۔

بریفنگ میں بتایا گیا کہ پاکستان کے لیے جی ایس پی پلس حیثیت کے تحت ترجیحی تجارتی انتظام میں توسیع کے حوالے سے بھی اقدامات کیے جا رہے ہیں تاکہ یورپی منڈی تک پاکستان کی رسائی برقرار رکھی جا سکے۔

اجلاس میں نائب وزیراعظم و وزیر خارجہ محمد اسحاق ڈار، وفاقی وزراء محمد اورنگزیب، رانا تنویر حسین، جام کمال خان اور احد خان چیمہ، وزیر مملکت برائے خزانہ بلال اظہر کیانی، وزیراعظم کے مشیر ہارون اختر، EDF بورڈ کے چیئرمین عمر سعید اور متعلقہ اداروں کے سینئر حکام نے شرکت کی۔