صدر مملکت آصف علی زرداری کی سنگاپور کے قومی دن پر صدر، حکومت اور عوام کو مبارکباد
Read Time:1 Minute, 24 Second
اسلام آباد، یورپ ٹوڈے: صدر مملکت آصف علی زرداری نے سنگاپور کے 61ویں قومی دن کے موقع پر صدر تھرمن شنموگراتنم، حکومت اور عوام کو دلی مبارکباد پیش کی ہے۔
صدر مملکت نے اپنے تہنیتی خط میں کہا کہ پاکستان سنگاپور کی قوم سازی اور اقتصادی ترقی کے شاندار سفر کو قدر کی نگاہ سے دیکھتا ہے، جو دوراندیش قیادت، دانشمندانہ طرز حکمرانی اور عوام کے غیر متزلزل عزم کے نتیجے میں ممکن ہوا۔
صدر زرداری نے کہا کہ سنگاپور کی کامیابیاں استقامت، جدت اور ترقی کی ایک قابلِ تقلید مثال ہیں۔
صدر مملکت نے اس امر کو بھی اجاگر کیا کہ رواں سال پاکستان اور سنگاپور کے درمیان سفارتی تعلقات کے قیام کی 60ویں سالگرہ کی مناسبت سے خصوصی اہمیت کا حامل ہے۔
انہوں نے کہا کہ گزشتہ چھ دہائیوں کے دوران دونوں ممالک کے درمیان دوستی باہمی اعتماد، خیرسگالی اور عوامی سطح پر قریبی روابط کی بنیاد پر مسلسل مستحکم ہوئی ہے۔
صدر زرداری نے کہا کہ پاکستان اور سنگاپور کثیرالجہتی فورمز پر باہمی تعاون جاری رکھتے ہوئے دوطرفہ سیاسی روابط کو بھی مزید مستحکم بنائیں گے۔
انہوں نے کہا کہ ڈیجیٹل معیشت، گرین ٹیکنالوجی، بحری و لاجسٹکس روابط، شہری منصوبہ بندی، فنی تربیت، تعلیمی و ثقافتی تبادلوں اور سیاحت سمیت مختلف شعبوں میں دوطرفہ تعاون کے وسیع امکانات موجود ہیں۔
صدر مملکت نے کہا کہ پاکستان باہمی مفاد کے تمام شعبوں میں تعاون کو مزید مضبوط بنانے کے لیے سنگاپور کے ساتھ قریبی اشتراک کے لیے تیار ہے، تاکہ دونوں ممالک اور ان کے عوام کے مفادات کو فروغ دیا جا سکے۔
صدر مملکت کے تہنیتی پیغام کے حوالے سے صدر سیکرٹریٹ کے میڈیا ونگ نے اتوار کو جاری کردہ پریس ریلیز میں یہ تفصیلات فراہم کیں۔
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0 