وزیراعظم شہباز شریف کا قائداعظم کی 78ویں برسی پر خراجِ عقیدت، قوم سے اتحاد کے ذریعے ان کا وژن مکمل کرنے کی اپیل
Read Time:1 Minute, 16 Second
اسلام آباد، یورپ ٹوڈے: وزیراعظم محمد شہباز شریف نے قائداعظم محمد علی جناح کی 78ویں برسی کے موقع پر انہیں خراج عقیدت پیش کرتے ہوئے قوم پر زور دیا ہے کہ وہ اتحاد، یکجہتی اور قومی جذبے کے ساتھ قائداعظم کے وژن کی تکمیل کے لیے اپنا کردار ادا کرے۔
وزیراعظم نے اپنے پیغام میں کہا کہ قائداعظم محمد علی جناح برصغیر کے مسلمانوں کے عظیم رہنما تھے جنہوں نے اپنی سیاسی بصیرت، اصول پسندی اور انتھک جدوجہد کے ذریعے مسلمانوں کے لیے ایک آزاد وطن کے قیام کی راہ ہموار کی۔
انہوں نے کہا کہ قائداعظم کی قیادت میں مسلمانوں نے ایک طویل اور تاریخی جدوجہد کے بعد پاکستان حاصل کیا۔ قائداعظم کا وژن ایک ایسے پاکستان کا قیام تھا جہاں آئین و قانون کی بالادستی، جمہوریت، مساوات، انصاف اور اقلیتوں کے حقوق کا تحفظ یقینی بنایا جائے۔
وزیراعظم نے کہا کہ قائداعظم کی زندگی اور افکار آج بھی قوم کے لیے مشعلِ راہ ہیں۔ ان کے اصولوں پر عمل پیرا ہوکر ہی پاکستان کو ایک مضبوط، خوشحال، ترقی یافتہ اور مستحکم ریاست بنایا جاسکتا ہے۔
انہوں نے کہا کہ موجودہ حالات میں قومی اتحاد اور یکجہتی کی پہلے سے کہیں زیادہ ضرورت ہے۔ قوم کو چاہیے کہ وہ اپنے اختلافات کو بالائے طاق رکھتے ہوئے ملک کی ترقی، استحکام اور خوشحالی کے لیے متحد ہوکر کام کرے۔
وزیراعظم محمد شہباز شریف نے اس عزم کا اظہار کیا کہ حکومت قائداعظم کے تصور کے مطابق پاکستان کو ایک مضبوط، خودمختار، جمہوری اور خوشحال ملک بنانے کے لیے اپنی کوششیں جاری رکھے گی۔
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0 