علاقائی صورتحال کے پیشِ نظر مکمل تیاری یقینی بنائی جائے، وزیراعظم شہباز شریف کی ہدایت

Read Time:2 Minute, 11 Second

اسلام آباد، یورپ ٹوڈے: وزیراعظم محمد شہباز شریف نے متعلقہ اداروں کو ہدایت کی ہے کہ خطے میں جاری غیر یقینی صورتحال کے تناظر میں کسی بھی ممکنہ چیلنج سے نمٹنے کے لیے مکمل تیاری برقرار رکھی جائے، جبکہ حکومت کی کفایت شعاری اور ایندھن بچاؤ مہم میں عوامی تعاون کو قابلِ ستائش قرار دیا ہے۔

جمعرات کو علاقائی کشیدگی کے قومی معیشت پر ممکنہ اثرات کا جائزہ لینے کے لیے منعقدہ اعلیٰ سطحی اجلاس کی صدارت کرتے ہوئے وزیراعظم نے کہا کہ اللہ تعالیٰ کے فضل و کرم سے اس وقت قومی معیشت مستحکم ہے، تاہم بدلتی ہوئی علاقائی صورتحال کے پیشِ نظر بروقت اقدامات کے لیے جامع حکمتِ عملی وضع کرنا ناگزیر ہے۔

اجلاس کو بریفنگ میں بتایا گیا کہ ملک میں اس وقت پٹرولیم مصنوعات کے وافر ذخائر موجود ہیں جو ملکی ضروریات پوری کرنے کے لیے کافی ہیں، جبکہ مستقبل میں بھی ان کی مسلسل فراہمی یقینی بنانے کے لیے مؤثر انتظامات کیے جا چکے ہیں۔

وزیراعظم نے ایندھن کی فراہمی سے متعلق حکومتی حکمتِ عملی کو بروقت اور مؤثر قرار دیتے ہوئے کہا کہ اس کے نتیجے میں ملک میں پٹرولیم مصنوعات کی دستیابی کو بہترین انداز میں یقینی بنایا گیا ہے۔ انہوں نے کہا کہ حکومت نے عام شہریوں، موٹر سائیکل سواروں، رکشہ ڈرائیوروں اور ٹرانسپورٹرز کے مفادات کا تحفظ کیا ہے، جبکہ حکومتی سبسڈی کے باعث ایندھن کی قیمتوں میں اضافے کے ممکنہ اثرات کو محدود رکھنے میں مدد ملی۔

شہباز شریف نے ہدایت کی کہ صوبائی حکومتوں کے ساتھ مکمل رابطے میں رہتے ہوئے مارکیٹ میں پٹرولیم مصنوعات کی مصنوعی قلت پیدا کرنے والے عناصر کے خلاف سخت کارروائی کی جائے۔

وزیراعظم نے حکومت کی سابقہ کفایت شعاری مہم کی کامیابی میں عوام کے کردار کو سراہتے ہوئے ان کا تہہ دل سے شکریہ ادا کیا اور کہا کہ جس جذبے کے ساتھ عوام نے سادگی اور کفایت شعاری کی مہم میں حکومت کا ساتھ دیا، اسی جذبے کو اب قومی سطح پر فروغ دینے کی ضرورت ہے۔

انہوں نے پٹرولیم مصنوعات اور توانائی کے تحفظ کے لیے جاری قومی مہم میں عوامی تعاون کو بھی ملکی معیشت کے استحکام میں اہم کردار قرار دیتے ہوئے اس کی تعریف کی۔

وزیراعظم نے خبردار کیا کہ خطے میں بڑھتی ہوئی کشیدگی مستقبل میں ملکی اقتصادی صورتحال پر منفی اثرات مرتب کر سکتی ہے، لہٰذا تمام متعلقہ اداروں کو ہر وقت چوکنا اور مکمل طور پر تیار رہنا چاہیے۔

اجلاس میں وفاقی وزراء احد خان چیمہ، محمد اورنگزیب، علی پرویز ملک، اویس خان لغاری، وزیرِ مملکت بلال اظہر کیانی، وزیراعظم کے معاونِ خصوصی طارق باجوہ، اسٹیٹ بینک کے گورنر جمیل احمد اور دیگر اعلیٰ سرکاری حکام نے شرکت کی۔